امساك .. اسهال .. انتفاخ ،، فكر بالسلياك

امساك .. اسهال .. انتفاخ ،، فكر بالسلياك

هزال
ضعف في النمو
سوء تغذيه
تاخر الدوره الشهرية
او تأخر البلوغ عموما
امساك يعقبه اسهال
الام في المفاصل والعضلات
طفح جلدي
اكتئاب وتوتر
انتفاخ وحموضه
مافيه طبيب الا وزرتوه
كل شوي تحليل و كل شوي تشخيص :ggg:

طيب هذي اعراض مو غريبه و تصير مع اشخاص كثير و تشخص تشخيصات مختلفه وكلها صحيحه ليه ؟؟ ( اعط الخبز خبازه )
امراض الجهاز الهضمي اعراضها متشابهه لكن الطبيب هو اللي يعرف يفرق بينها بمساعدتك انت
سواء كنت انت التعبان او ولدك بنتك او حتى جدك

سالتني وحده وش اكل إذا كان معي سلياك ؟؟
قلت لها تغدي بس :)
امزح ترى
بس بقول لكم ان الرز مناسب لمرضى السلياك
أما الخبز  مو مناسب واحنا ناكله على الفطور و العشاء :)


طيب وش انت يالسلياك ؟؟؟

السلياك يالحبايب هو باختصار حساسية
إيه حساسية
بتقولون تسبب كل هذا ؟؟؟ اقول لكم واعظم بس اصبروا شوي

السلياك هو (حساسية عدم تحمل الجلوتين) او ( الدبقين )

يعني ان جسمك ( أمعائك ) ما تتحمل الماده هذي ( حساسية ) و يصير عندك تشوه بالأمعاء أو بمعنى اكثر دقه (( انتفاخ في الخملات المسئوله عن امتصاص الطعام  )) فتكون غير قادره على العمل
بمعنى ان الطعام ما يمتص من الأمعاء فتجيك كل امراض سوء التغذية
انيميا ( حديد، ب12 ، فوليك )
هشاشة عظام
وهن وتعب
وضعف النمو
حتى الاجهاض المتكرر و العقم الغير مبرر يرجع احيانا للسلياك لأن باختصار مافيه عناصر غذائية تغذي الجنين او حتى تصنع الحيوانات المنويه

الحين بتسألون من ايش يجينا السلياك و متى نكون معرضين له ؟؟
مرض السلياك وراثي بالدرجه الأولى لكن و اقول لكن لأنها مهمه يتأثر بالعوامل البيئية
طيب العوامل البيئية هذي وشي ؟؟
الصدمات النفسية ، الاصابات الفيروسية ، الحمل و الولاده ، والعمليات الجراحية
الامهات ياللي ما يرضعون اطفالهم يعرضون الصغار للسلياك :(
الام ياللي ما تسمع كلام الاطباء و تسمع كلام جدة جدتها (عطي وليدك وعطي وليدك ) لا تعطى الاطعمه الصلبه قبل اكمال الطفل الشهر السادس سمعتوا مو تقولين سريلاك ترى سريلاك القمح مكتوب عليه بعد الشهر السادس مو عبث حتى يكون الطفل قادر على تحمل الجلوتين (موجود بالقمح ) تقدرين تعطين طفلك منتجات الأرز لكن بعد ما يكمل الشهر الرابع

طيب نرجع لموضوعنا السلياك
قلنا ان السلياك هو حساسية عدم تحمل الجلوتين
والجلوتين هو نوع من أنواع البروتين موجود في اغلب الحبوب وهو اللي يترك العجين مطاط

انواع الحبوب الموجود فيها الجلوتين ومرضى السلياك لابد يتركونها
القمح ، الشعير ، الشوفان ، الجاودار
وطبعا ككككككككللللللل منتجاتها من خبز معكرونه شوكولاته اللي يدخل في مكوناتها مستخلص الشعير (الملت)  وغيرها.
السلياك ممكن يظهر باي وقت و اي عمر ومو معروف اسباب ظهوره حتى الآن

طيب عرفنا ايش هو المرض و عرفنا ابرز اعراضه باقي نعرف كيف علاجه
علاجه بكلمه بسيطه جدا هو تجنب كل الأطعمه المحتويه على الجلوتين

البدائل منتجات الأرز ، الذره ، فول الصويا ، البطاطس ، الدخن
 
يكون التحسن واضح جدا من بداية الحمية ( تجنب الجلوتين ) تستمر الحمية لمدى الحياة
وممكن للمصابين ممارسة حياتهم بشكل طبيعي دون اي مشاكل مع الحميه
الشفاء التام بعون الله ( ترجع الخملات لطبيعتها و تعمل عملها ) ياخذ 3-6 اشهر عند الأطفال و يوصل لسنتين عند الكبار 

ولابد لأي سلياكي :) يقرأ و يتمحص البطاقه الغذائية للمنتجات و يبعد عن اي شيء فيه جلوتين أو مستخلص الشعير او دبقين لأن اي كمية لو بسيطه من الجلوتين ممكن انها ترجعك مثل اول

وربي يشفي الجميع